Gethuk Semar Karanganyar

Gethuk Semar

Sapa sing durung ngerti gethuk? Gethuk iku panganan tradisionale wong Jawa sing diolah saka tela menyok. Gethuk isih gampang ditemoni ning pasar-pasar utawa toko roti sing nyediakna jajan pasar. Malah ning kutha-kutha tartamtu, gethuk uga dadi oleh-oleh sing khas. Nanging aku ora pati seneng karo gethuk oleh-oleh ngono kuwi, amerga racake wis diwenehi maneka rasa lan pengawet. Katitik rasane wis adoh karo rasa gethuk asli. Yo wajar yen gethuk oleh-oleh diwenehi pengawet, amarga pancen gethuk iku ora tahan suwe, alias gampang mambu.

Menawa ning Ngawi, aku isih asring nggawe gethuk dewe amarga bapakku nandur tela turut galengan sawah. Tela sing arep digawe gethuk kudu tela sing medhok, empur. Cara gampang nggawe gethuk yaiku, tela menyok dikukus bareng parutan kambil, menawa wis medhok dientas, dijojoh nganti lembut barengan uyah lan gula. Terus diladekna nganggo parutan kambil. Nyam...nyam...

Lha ning Karanganyar, aku nemu gethuk sing ora nganggo pengawet. Ngertine mbiyen awale, mbuh tahun 2015 apa 2016 ngono, ana tamu sing nggawakne oleh-oleh gethuk sing merk e "Gethuk Semar" iki. Bareng ngrasakne, byuh lha kok jebule enak banget gethuke. Prejengane ngono ya jane biasa wae, kaya gethuk sing sering tak gawe ngono, ning rasane empuk, arum, gurih telane, legit. Beda adoh karo gethuk gaweyanku wkwkwk. Bar ngono terus tuman, anjeg tuku dewe. Malah pas ning acara arisan keluarga sering gethuk Semar iki dinggo pasugatan. Ee lha kok ya padha remen jebule.

Sakurunge ngerti gethuk Semar iki, aku wis sering krungu babagan gethuk Kethek ning daerah Salatiga. Durung tau weruh wujude, ning bayanganku ya mirip gethuk Semar iki, amarga jarene ya gampang mambu. Dene Gethuk Semar iki produksine Hj Nurul Retno ing Karangpandan, Karanganyar. Nanging ora usah kuatir sing omahe adoh saka Karangpandan, gethuk Semar nduweni outlet ing panggonan-panggonan liya. Kayata ing Karanganyar, outlet e manggon ana ing Badran, Cangakan, Karanganyar. Saka alun-alun ngetan sithik, terus menggok ngiwa. Biyen ning Sragen ya ana, nanging bareng aku mampir arep tuku maneh, lha kok wis ganti dadi gethuk Presiden. Mungkin sing duwe outlet nggawe gethuk dewe, sing mirip gethuk Semar, dijenengi gethuk Presiden iku. (Update: jare bojoku ana outlet Gethuk Semar ing salah sawijine rumah sakit ning Sragen). Ning Solo biyen ya ana, ning jalan Slamet Riyadi, kulone Gladag. Ning saiki embuh ijik apa ora, merga aku wis suwe ora liwat kana.

Gethuk Semar Goreng

Masiya isa kanggo oleh-oleh, nanging gethuk Semar iki ora tahan suwe, merga ora nganggo pengawet. Kira-kira mung kuat 8 jam ing suhu ruang. Dene yen dilebokna kulkas isa tahan 2 dina (luwih saka kuwi durung ngerti aku, merga urung tau nyoba, wis selak entek hehe). Gethuke ana rong werna, gethuk biasa karo gethuk goreng. Gethuk goreng iku gethuk biasa digoreng nganggo lapisan glepung panir. Gethuk biasa regane sakkotak 15 ewu, isine 18 iris. Dene gethuk gorenge aku lali regane wkwkwk...maap.

 

Ning Ngawi barang saiki ya ana gethuk model ngene iki, kira-kira ya terinspirasi gethuk Semar paling. Jenenge gethuk "Anyar". Jan, gethuk saiki dadi moncer ngono...aku ya melu seneng. Muga-muga saya akeh meneh panganan tradisional sing moncer, kareben ora ilang kagiles jaman.